| |
Rapport frå HIFO-seminar 2006
Eg takkar for økonomisk stønad i form av reisestipend
frå Arkivarforeninga for å reise på HIFO-seminar
2006, og sender her ein rapport frå seminaret.
HIFO-seminaret 2006 gjekk av stabelen i Kristiansand 5.-7. mai
2006. Programmet veksla mellom fellessesjonar, parallelle sesjonar,
ekskursjonar og sosiale samvær. Fellessesjonane inneheldt
tema som skulle interessere dei fleste som arbeider med historiefaget,
både som forvaltarar/arkivarar og formidlarar/utgjevarar.
Den første fellessesjonen fokuserte på historikarane
si rolle i det offentlege rom. Foredragshaldarane, Dag Jenssen,
May-Brith Ohmann Nielsen, Hilde Henriksen Waage og Anne-Hilde Nagel,
såg på dei ulike rollene historikarane har som forskarar,
forfattarar, formidlarar og ideologar i samfunnet. Ikkje minst vart
det fokusert på kontakten med og formidlinga gjennnom media
og litteratur og fagleg truverd knytt til tilgjengeleg kjeldemateriale.
Waage la vekt på kor alvorleg og vanskeleg historieformidling
i det offentlege rom blir når arkivmateriale ikkje er tilgjengeleg
for offentleg ettersyn, slik det no t.d er i saka om osloprosessen
og midtaustenproblematikken. Vi fekk også ein grundig gjennomgang
av god skikk og bruk av litteratur og kjelder i allmenn, historiske
framstillingar basert på rapporten frå utvalet som vart
sett ned på bakgrunn av diskusjonen om siteringspraksis og
plagiatproblematikk som kom opp etter at Karsten Alnæs skreiv
si norgeshistorie. Den siste fellessesjonen var eit foredrag med
påfølgjande diskusjon der Stein Tønnesson tok
utgangspunkt i amerikansk historieforskning nett no, og prøvde
å dra liner til vår eigen situasjon ut frå tittelen:
Historikaren i kampen om historia.
Eg valte å følgje parallellsesjonane om regional kulturarv
som grunnlag for kollektiv sjølvforståing, demokratisk
teori – historisk praksis og norsk kystkultur. Regional identitet
er tema for pågåande forskningsprosjekt og interessant
ut frå mange aspekt. Sosiale felleskap, politisk kultur, religøs
utvikling, demokratisk praksis, geografiske særtrekk er bare
nokre av desse. Foredragshaldarar her var m.a. Hans Fredrik Dahl,
Hans Kjetil Lysgård, Pål Repstad, Bjørg Seland,
Alf Ragnar Nielssen, Dag Hunstad og Per Norseng. Særleg interessant
for mitt sjølvalte forskningsprosjekt ved RA var foredraga
om kystkultur og religiøs identitet.
Hilde Sandvik leda sesjonen som presenterte det nyleg oppstarta
demokratiprosjektet ved UiO. Prosjektet har fått tittelen
”Demokratisk teori – historisk praksis” og dei
fleste deltakarane var tilstades og presenterte sine ulike forskninsprosjekt.
Odd Arvid Storsveen la fram arbeidet med å finne meir ut av
kvifor Norge fekk så breidt veljargrunnlag, Mona Ringvej skal
sjå på fortolkinga av demokrati i eit revolusjonsårhundre,
Kaj Østberg går nærare inn på borgerånd
og sosiabilitet i Danmark og Norge mellom 1750 og 1830, Øystein
Rian skriv om trykkefridom og sensur på slutten av 1700-talet,
Knut Dørum arbeider med bondeopposisjonen og Hilde Sandvik
fokuserar på den frie borgar og ekteskapslovgjevinga.
I tillegg til alle desse engasjerande foredraga var eg også
med på ekskursjonen til fem av dei vel 30 lystgardane som
vart bygde rundt Kristiansand i perioden 1770-1820.
Margit Løyland
|
